Конкурс сацыяльных праектаў Social Weekend прымае заяўкі
Каб сабраць усіх летуценнікаў і летуценніц разам, падтрымаць неабыякавых людзей, якія хочуць прынесці карысць Беларусі ўжо ў найбліжэйшай будучыні, арганізатары найбуйнейшага конкурсу сацыяльных праектаў Social Weekend абвяшчаюць старт шаснаццатага сезона. Заяўкі прымаюцца да 28 лютага 2021 года.
Конкурс пройдзе пад слоганам “А ты паспрабуй!” — такім чынам каманда Social Weekend заклікае не апускаць рукі, а брацца за справу, нават калі здаецца, што ідэя занадта цяжкая для рэалізацыі.
Каб як мага больш задумак змаглі ўвасобіцца ў рэальнасць, тэрмін конкурсу гэтым разам падоўжаны.
— Звычайна сезон конкурсу доўжыцца 5 месяцаў, і гэта вельмі інтэнсіўная праца і для ўдзельнікаў, і для нашай каманды, — распавядае пра новаўвядзенні конкурсу дырэктар мясцовага фонду “Добра”, кіраўнік Social Weekend Аляксандр Скрабоўскі. — У мінулым сезоне мы атрымалі 470 заявак і бачылі складанасць у тым, што людзі з незвычайнымі ідэямі не ўмеюць пра іх даступна расказаць на старце. Здольнасць растлумачыць сутнасць праекта за кароткі час, прэзентаваць вынікі і расказаць аб паспяховым вопыце не менш важная, чым сам вопыт.
Цяпер мы будзем вырашаць праблему камунікацыі аўтараў ідэй і іх патэнцыйнай мэтавай аўдыторыі з першых дзён знаёмства. Нават для тых, хто не патрапіць у трэк навучання. Мы працягнулі сезон яшчэ на месяц і прысвецім гэты час пошуку дадатковых рэсурсаў і дапамогі кожнаму праекту.
Прыняць удзел у Social Weekend могуць людзі з любымі ідэямі, якія накіраваны на развіццё культуры, грамадства, інфраструктуры, медыцыны, адукацыі, навукі і іншых сфер жыцця.
Грошы ад мецэнатаў і кампаній праекты атрымаюць на першыя крокі праекта-фіналіста. У мінулым, пятнаццатым Social Weekend, каманды атрымалі падтрымку на суму больш за 100 000 BYN.
— Часта сацыяльны праект успрымаюць як рашэнне той ці іншай праблемы, аднак мы чакаем праекты, якія прадастаўляюць новыя магчымасці, якія адкрываюць новыя падыходы. Падаць заяўку можа любы чалавек ці арганізацыя. Няма і абмежаванняў па ўзросту. Акрамя таго, форма заяўкі спрашчаецца ад сезону да сезону, таму падзяліцца сваёй ідэяй з шырокай аўдыторыяй становіцца ўсё прасцей, — дапаўняе каардынатар Social Weekend Таццяна Траяновіч.
Да народнага галасавання і экспертнага адбору праектаў усе, хто падаў заяўку на конкурс, змогуць паўдзельнічаць у бясплатных семінарах, дзе даведаюцца базавую інфармацыю па запуску праекта, працы з супольнасцю і пошуку рэсурсаў для сваёй ініцыятывы.
Арганізатар Social Weekend — Мясцовы сацыяльны фонд “Добра”, мэта якога — прыцягненне рэсурсаў бізнесу: інтэлектуальных, грашовых і іншых — для інвеставання ў сацыяльныя стартапы і дасягненне Мэт устойлівага развіцця. Фонд таксама з’яўляецца Офісам сеткі Глабальнага дагавора ААН у Беларусі.
