«Вашы дзеянні не патрабуюць чыйгосці дазволу, каб мець значэнне»
«Вашы дзеянні не патрабуюць чыйгосці дазволу, каб мець значэнне. Не чакайце, пакуль сістэма запросіць вас да ўдзелу. Шукайце або стварайце ўласную прастору, знаходзьце саюзні_ц ды пачынайце сваю размову. Мы [моладзь] патрэбныя планеце, і дзеянні нават у самых цяжкіх умовах — гэта тое, што маладыя беларус_кі робяць кожны дзень»
Юлія Ралко, Міжнародная сакратарка «РАДА», на адкрыцці Еўрапейскага тыдня моладзі (European Youth Week 2026) у Еўрапейскім Парламенце ў Брусэлі.
Для «РАДА» гэты момант быў сапраўды важным. У залі прысутнічалі больш за 1000 маладых удзельні_ц, палітык_інь і спецыяліста_к па працы з моладдзю з усёй Еўропы, і для многіх з іх гэта, магчыма, быў першы раз, калі яны даведаліся, праз што ўсё яшчэ праходзіць моладзь у Беларусі і чаму наступствы 2020 года яшчэ не скончыліся. Таму «РАДА» працягвае расказваць пра беларускую моладзь усюды, дзе для гэтага ёсць месца. І гэтым разам наш голас сапраўды прагучаў.
“Гэта гісторыя не проста пра прыгожыя фоткі. Гэткія моманты сігналізуюць, што беларуская моладзь надалей прысутнічае ў еўрапейскай павестцы. Мы не проста ўспамін пра 2020 год, але і жывая палітычная і чалавечая рэальнасць, якую ўсё яшчэ трэба бачыць, разумець і падтрымліваць. Запрашэнне да ўдзелу ў панэлі такога ўзроўню – для Юліі, для «РАДА» – вынік працяглай працы з міжнароднымі партнёрамі, паказчык таго, што нас ведаюць, нам давяраюць, да нас прыслухоўваюцца. І мы працягнем выкарыстоўваць гэтыя магчымасці і кантакты для таго, каб прасоўваць і адвакатаваць патрэбы моладзевых арганізацый і моладзі”.
Кацярына Буніна, Генеральная сакратарка «РАДА».
Панэль, у якой удзельнічала Юлія, была прысвечана ўдзелу моладзі, прыняццю рашэнняў і кліматычнай справядлівасці. Мы прадставілі беларускую перспектыву: кліматычная справядлівасць — гэта ў тым ліку пра доступ да інфармацыі, мажлівасць значнага ўдзелу і рэальнага ўплыву на важныя для будучыні моладзі рашэнні.
Еўрапейскі тыдзень моладзі арганізуецца Еўрапейскай камісіяй кожныя два гады, каб адзначаць і прасоўваць удзел моладзі па ўсёй Еўропе і за яе межамі. Вялікі дзякуй арганізатар_кам за запрашэнне на гэтае выдатнае мерапрыемства!
