Пра нас

Беларускі нацыянальны моладзевы савет “РАДА” – незалежны дэмакратычны нацыянальны моладзевы савет Беларусі, сябра Еўрапейскага моладзевага форуму (YFJ), пачаў працу ў 1992 годзе. Зараз БНМС “РАДА” аб’ядноўвае 34 моладзевыя арганізацыі і ініцыятывы Беларусі.

У выніку рэпрэсіўнай палітыкі ўладаў у дачыненні да грамадзянскай супольнасці “РАДА” пазбаўлена афіцыйнай рэгістрацыі ў Беларусі з 2006 года.

Нягледзячы на ​​гэта нам удалося захаваць структуру і весці дзейнасць дзякуючы міжнародным партнёрам. Доўгі час дзейнасць “РАДА” не была публічнай і факусавалася выключна на падтрымцы сяброўскіх арганізацый.

Пачынаючы з 2014 года “РАДА” змяніла падыход у сваёй працы і стала больш заўважнай у грамадстве. У апошнія гады “РАДА” павялічыла колькасць арганізацый-сябраў, якія прадстаўляюць такія сферы моладзевага сектара як ЛГБТК, праваабарона, студэнцтва, інклюзія.

“РАДА” прэтэндуе на пазіцыю, якую звычайна займаюць нацсаветы, і імкнецца выконваць наступныя задачы па:

• кансалідацыі дэмакратычных моладзевых арганізацый і ініцыятыў у Беларусі і ўзмацненню іх голасу на нацыянальным і міжнародным узроўнях;
• маніторынгу дзейнасці дзяржаўных органаў у дачыненні да абяцанняў, адрасаваных моладзі краіны;
• заахвочванню і падтрымцы развіцця каштоўнасцей моладзевага сектара (такіх, як актыўны ўдзел, незалежнасць, крытычнае мысленне, дэмакратыя, права на свабоду асацыяцый і перакананняў і правы чалавека), шырокай грамадскасці і органаў, якія адказваюць за працу з моладдзю;
• актуалізацыі і распаўсюджванню ў Беларусі міжнародных стандартаў, накіраваных на падтрымку развіцця беларускага моладзевага сектара, урадавых і няўрадавых, мясцовых і нацыянальных арганізацый;
• стымуляванню моладзевых арганізацый і ініцыятыў да ажыццяўлення дзейнасці і свядомага ўцягвання моладзі, уліку яе патрэб і клопатаў у сваёй дзейнасці, і прамой працы з маладымі людзьмі;
• дасягненню ўстойлівасці, улічваючы змененыя палітычныя і фінансавыя ўмовы, з якімі сутыкаецца беларуская грамадзянская супольнасць.

Цяперашні кантэкст моладзевага сектара ў Беларусі абумоўлены наступнымі ключавымі фактарамі:

– Узмацненне рэпрэсій супраць грамадзянскай супольнасці з 2020 года, у выніку маладыя актывісты і актывісткі вымушаныя былі збегчы з краіны, а частка апынулася ў зняволенні. Іншым важным фактарам стала ліквідацыя зарэгістраваных арганізацый, у тым ліку большасці сяброўскіх арганізацый “РАДА”. Усё гэта прывяло да таго, што ў Беларусі рэалізацыя права на свабоду асацыяцыі, мірных сходаў і свабоду слова стала прадметам крымінальнай адказнасці.

– Пандэмія COVID-19, у выніку якой на працягу доўгага часу грамадскія арганізацыі былі рэдкімі праваднікамі ў Беларусі інфармацыі аб небяспецы каранавіруснай інфекцыі, сродкаў змяншэння рызыкі захворвання і іншых рэкамендацый СААЗ. Моладзевыя арганізацыі часта бралі адказнасць за сваіх валанцёраў і валанцёрак, людзей, якія ўдзельнічалі ў мерапрыемствах, і самастойна ўводзілі правілы паводзін падчас мерапрыемстваў, давалі маскі і антысептыкі, пераносілі актыўнасці ў анлайн. З-за пандэміі многія маладыя людзі ў Беларусі апынуліся ва ўразлівым становішчы: міжнародныя праграмы і праекты былі прыпыненыя альбо перанесеныя на нявызначаны тэрмін, а навучальныя ўстановы хаатычна ўводзілі і адмянялі розныя правілы, што прыводзіла да парушэння навучальнага працэсу і пагаршала стаўленне паміж навучэнцамі і адміністрацыяй.

– Лічбавасць грамадства і дзейнасці моладзевых арганізацый, дадзеная тэндэнцыя з аднаго боку, была лагічным працягам павелічэння выкарыстання інфармацыйных тэхналогій у грамадстве, але, з другога боку, была паскорана з прычыны актывізацыі грамадзянскай супольнасці на працягу 2020 года, а таксама пандэміяй COVID-19. Дзякуючы гэтай тэндэнцыі мерапрыемствы арганізацый магла наведаць большая колькасць чалавек, незалежна ад геаграфічнага становішча, выкарыстоўваліся новыя тэхналогіі, павялічвалася лічбавая пісьменнасць, у тым ліку крытычны падыход да атрымання інфармацыі, клопат аб лічбавай. Адным з негатыўных эфектаў лічбавасці дзейнасці стаў сіндром стомленасці (zoom-fatigue), з-за якога неабходна было пераглядаць і змяняць фармат працы ў анлайн.

– Зніжэнне аўтарытэту дзяржаўных органаў і павелічэнне аўтарытэту арганізацый грамадзянскай супольнасці паскорылася ў сілу сацыяльна-палітычнага і эпідэміялагічнага крызісаў, але тэндэнцыя існавала ўжо даўно, што пацвярджаецца даследаваннем “РАДА” (сакавік 2020).
У рамках даследавання было выяўлена, што ступень даверу і ўдзелу ў дзейнасці АГС дасягала 40% у моладзевым асяроддзі, у той час, як узаемадзеянне з дзяржаўным органам і праграмамі ажыццяўлялі толькі 11%.

– Актыўныя ўзброеныя канфлікты ў рэгіёне Усходняга Партнёрства, асабліва ваеннае ўварванне Расійскай Федэрацыі ва Украіну, прывялі да вялікай колькасці негатыўных тэндэнцый для беларускіх АГС. Многія з тых, хто пераследаваўся па палітычных матывах у Беларусі і пераехалі ва Украіну, былі вымушаны пакінуць тэрыторыю краіны ў сувязі з ваеннымі дзеяннямі. Беларусы і беларускі сутыкнуліся з дыскрымінацыяй і пагрозамі ў розных краінах свету з-за таго, што рэжым Лукашэнкі даў войскам РФ магчымасць нападу са сваёй тэрыторыі. Мноства моладзевых і іншых АГС у сувязі з вайсковымі дзеяннямі яшчэ больш сфакусаваліся на гуманітарным кірунку ў сваіх праектах і праграмах.