Востры ролік аб празрыстасці размеркавання бюджэтаў ВНУ
Маладыя сацыял-дэмакраты “Маладая Грамада” і Задзіночанне Беларускіх Студэнтаў апублікавалі відэа “Транспарэнтнасць ВНУ“. Ролік у дасціпнай форме звяртае ўвагу на тое, што ў Беларусі немагчыма атрымаць поўную інфармацыю аб фарміраванні і размеркаванні бюджэтаў навучальных устаноў.
“Тэма празрыстасці размеркавання сродкаў грамадзян становіцца яшчэ больш актуальнай у сувязі з кампаніяй студэнтаў супраць платных пераздач у БДУ і ўвагай да нізкай якасці нашай вышэйшай школы,” – адзначаюць арганізатары кампаніі.
“Сапраўды, апошнім часам дзяржава ўсё меньш фінансуе адукацыю, што нязменна павышае кошты для студэнтаў. Вядома, што кошт навучання ў ВНУ Гішпаніі, Францыі ці Германіі не перавышае 1000 еўра на год, а ў скандынаўскіх краінах вышэйшая адукацыя бясплатна. Пры гэтым узровень абсталявання і тэхнічнана забеспячэння еўрапейскіх ВНУ сур’ёзна перавышае наш.
У свабодным доступе маёцца далёка не поўны аб’ем інфармацыі аб беларускіх ВНУ і немагчыма дакладна ведаць, куды былі ў выніку патрачаны грошы,” – адзначаюць маладыя людзі.
“Нельга забываць, што бюджэт любога ВНУ – гэта не грошы чыноўнікаў – гэта грошы студэнтаў-платнікаў, а таксама ўсіх падаткаплацельшчыкаў. І мы маем права ведаць, наколькі эфектыўна нашыя сродкі былі выкарыстаны”.
Маладыя сацыял-дэмакраты “Маладая Грамада” і Задзіночанне Беларускіх Студэнтаў” заклікаюць усіх неабыякавых далучацца да кампаніі па празрыстасці бюжэтаў ВНУ. Для гэтага дастаткова напісаць ліст на адрас transparentnasc@gmail.com.
