Адраджэнне актыўнай дзейнасці ЗБС

Задзіночанне беларускіх студэнтаў і ініцыятыва “Студэнты супраць” заявілі пра аб’яднанне і прэзентавалі агульную праграму дзейнасці. “Вока”, “1000+”, “10 тэзісаў” і іншыя супольныя праекты адной са старэйшых студэнцкіх арганізацый і свежай ініцыятывы накіраваныя на актывізацыю студэнцкай супольнасці, распаўсюд інфармацыі ў галіне правоў студэнтаў і прыцягненне новых членаў у абноўленае ЗБС.

Адраджэнне актыўнай дзейнасці ЗБС
Прэзентацыя адноўленага ЗБС

Сваю місію ЗБС бачыць у “аб’яднанні беларускіх студэнтаў дзеля абароны сваіх правоў і інтарэсаў, павышэнні якасці вышэйшай адукацыі, барацьбе за акадэмічныя свабоды і прасоўванні іншых прынцыпаў Эўрапейскай сістэмы адукацыі, а таксама ўздыме нацыянальнай самасвядомасці праз папулярызацыю беларускай мовы і культуры”.

Першым крокам на шляху адраджэння ЗБС стане праца над тым, каб зноўку атрымаць дзяржаўную рэгістрацыю, якой моладзевае аб’яднанне было пазбаўленае ў 2001 годзе. Такая неабходнасць прадыктаваная аб’ектыўнымі прычынамі. Напрыклад, падчас дыялогу са студэнтамі розных ВНУ прадстаўнікі ЗБС часта чуюць пытанне “Ці вы зарэгістраваная арганізацыя?” і адчуваюць, што змушаныя пакуль працаваць без рэгістрацыі, яны маюць прыкладаць зашмат намаганняў, каб прыцягнуць актыўнае студэнства да рэалізацыі актуальных ініцыятыў.

Насамрэч шлях Задзіночання беларускіх студэнтаў як адной з самых смелых студэнцкіх ініцыятыў яшчэ савецкай, а потым і сучаснай Беларусі быў нялёгкім.

ЗБС быў створаны ў 1988 годзе як аб’яднанне нефармальных студэнцкіх груп, якія існавалі ў Беларускім дзяржаўным унівэрсітэце, мэдыцынскім і пэдагагічным інстытутах. Арганізацыя выступала за дэідэалогізацыю навучання ў ВНУ і развіццё акадэмічных свабод, цесна супрацоўнічаючы з беларускімі студэнтамі і выпускаючы ўласную газету “Студэнцкая думка”.

Але пасля росквіту студэнцкага руху ў 90-я, у 2000-х наступіў спад актыўнасці ЗБС, выкліканы рэпрэсіямі з боку ўлад, у тым ліку пазбаўленнем ЗБС рэгістрацыі. Аднак цягам 2000-х, працуючы ў вельмі складаных умовах, ЗБС змог рэалізаваць некалькі значных і важных праектаў. Напрыклад, у 2006 правёў кампанію “Выбірай!” (супраць прымусовага галасавання на выбарах), Адкрыты студэнцкі форум, на якім была створаная Дэкларацыя правоў студэнтаў Беларусі, кампаніі  “Ільготы кожны дзень”, “Хочам вучыцца па-беларуску!” і інш. ЗБС з’яўляецца паўнавартасным удзельнікам працы і поўным членам ESU – Еўрапейскага студэнцкага саюзу. Новы штуршок развіццю ЗБС далі студэнцкія пратэсты ў канцы 2015 – пачатку 2016 года, калі навучэнцы БДУ выступілі супраць увядзення платных адпрацовак.

Паралельна са зборам дакументаў для рэгістрацыі спачатку асвеніцкай арганізацыі, а потым моладзевага аб’яднання ЗБС працягвае дзейнаць. Каб стаць больш актуальным і зразумелым сваёй мэтавай аўдыторыі, ЗБС зрабіў поўны рэбрэндзінг сімвалаў арганізацыі, абнавіў сайт (свежыя навіны ЗБС чытайце на zbsunion.by) і правёў выбары ў Раду арганізацыі.

Паводле галасавання Старшынёй Рады ЗБС стаў Яўген Міхасюк. Таксама членамі Рады сталі актывісты Дар’я Пастухова, Ілля Сіліцкі, Марыя Колб, Глеб Вайкуль.

Новая Рада і актывісты ЗБС плануюць бліжэйшым часам засяродзіць увагу на правядзенні грамадскіх кампаній, развіцці студэнскага руху, стварэнні advocacy-кампаніі, асвеце і асвятленні праблем студэнтаў у медыях.

Адраджэнне актыўнай дзейнасці ЗБС
Старшыня Рады ЗБС Яўген Міхасюк

“Мы лічым, што неабходна адсочваць праблемы студэнтаў, а потым спрабаваць вырашаць іх. Напрыклад, збіраць подпісы і распавядаць пра праблемы ў медыях. Таксама мы плануем адрадзіць газету “Студэнцкая думка”, дапамагаць студэнцкім выданням у ВНУ, займацца адукацыяй у галіне правоў чалавека і правоў студэнтаў, прасоўваць беларускую мову і культуру”,  – такім бачыць адроджанае ЗБС новы Старшыня Рады Яўген Міхасюк.

У гэтым кірунку ўжо пачалі рэалізоўвацца новыя праекты ЗБС “Вока” (пра правы студэнтаў), “1000+” (прыцягненне тысячы новых членаў), “10 тэзісаў” (увядзенне права выбару вучэбных дысцыплін, празрыстасць бюджэтаў ВНУ, трансфармаванне пасады рэктара ў выбарчую, пашырэнне студэнцкага самакіравання і інш).

Адраджэнне актыўнай дзейнасці ЗБС Адраджэнне актыўнай дзейнасці ЗБС Адраджэнне актыўнай дзейнасці ЗБС Адраджэнне актыўнай дзейнасці ЗБС Адраджэнне актыўнай дзейнасці ЗБС Адраджэнне актыўнай дзейнасці ЗБС Адраджэнне актыўнай дзейнасці ЗБС
Адраджэнне актыўнай дзейнасці ЗБС Адраджэнне актыўнай дзейнасці ЗБС Адраджэнне актыўнай дзейнасці ЗБС Адраджэнне актыўнай дзейнасці ЗБС Адраджэнне актыўнай дзейнасці ЗБС Адраджэнне актыўнай дзейнасці ЗБС Адраджэнне актыўнай дзейнасці ЗБС Адраджэнне актыўнай дзейнасці ЗБС Адраджэнне актыўнай дзейнасці ЗБС Адраджэнне актыўнай дзейнасці ЗБС Адраджэнне актыўнай дзейнасці ЗБС Адраджэнне актыўнай дзейнасці ЗБС Адраджэнне актыўнай дзейнасці ЗБС Адраджэнне актыўнай дзейнасці ЗБС Адраджэнне актыўнай дзейнасці ЗБС Адраджэнне актыўнай дзейнасці ЗБС Адраджэнне актыўнай дзейнасці ЗБС Адраджэнне актыўнай дзейнасці ЗБС Адраджэнне актыўнай дзейнасці ЗБС Адраджэнне актыўнай дзейнасці ЗБС Адраджэнне актыўнай дзейнасці ЗБС