Шукаем міжнароднага_ую сакратара_ку!
Беларускі нацыянальны моладзевы савет “РАДА” шукае міжнароднага_ую сакратара_ку.
Гэтая пазіцыя прадугледжвае рэалізацыю міжнародных праектаў і прадастаўленне адпаведнай справаздачнасці, арганізацыю і каардынацыю замежных візітаў, зносіны з замежнымі партнёрамі, праца з сяброўскімі арганізацыямі, супрацоўніцтва з еўрапейскімі і міжнароднымі арганізацыямі і прадстаўленне “РАДА” на нацыянальным і міжнародным узроўнях.
Абавязкі:
- кіраванне міжнароднымі праектамі (планаванне, рэалізацыя, справаздачнасць) і каардынацыя працы праектнай каманды, кіраванне праектнымі рызыкамі і праектамі;
- камунікацыя з партнёрскімі арганізацыямі;
- арганізацыя мерапрыемстваў, падзей, сустрэч і візітаў (складанне парадку дня і яго ўзгадненне з партнёрамі, складанне тэхнічных планаў і дакументаў, забеспячэнне запрашэнняў і віз, падрыхтоўка спадарожных дакументаў, правядзенне мерапрыемстваў, падрыхтоўка справаздач, фасілітацыя сустрэч);
- каардынацыя і садзейнічанне праваабарончай, адукацыйнай, даследчай і асветніцкай дзейнасці пад кіраўніцтвам Генеральнай сакратаркі;
- дапамога прадстаўнікам_цам арганізацый “РАДА” для ўдзелу ў міжнародных мерапрыемствах і праектах (складанне анонсаў, адбор удзельнікаў_ніц, падрыхтоўка заданняў, падрыхтоўка дакументаў для віз і ўсіх спадарожных дакументаў для ўдзелу ў мерапрыемстве (квіткі, страхоўка, практычная інфармацыя і інш.);
- прадстаўленне інтарэсаў “РАДА” на нацыянальным і міжнародным узроўнях і зносіны/супрацоўніцтва з еўрапейскімі і міжнароднымі арганізацыямі/інстытутамі;
- забеспячэнне перакладу з англійскай на беларускую/рускую мовы і наадварот (пераклад артыкулаў, заявак, дакументаў або паслядоўны пераклад на сустрэчах);
- праца з сяброўскімі арганізацыямі (правядзенне рабочых груп па розных тэмах, прадастаўленне інфармацыі па міжнародных пытаннях, правядзенне праектаў па ўсталяванні кантактаў і г.д.)
Патрабаванні:
- навыкі і досвед кіравання праектамі;
- навыкі фінансавага мэнэджменту;
- выдатныя арганізатарскія здольнасці;
- выдатныя камунікатыўныя навыкі;
- абавязкова выдатнае веданне англійскай мовы як вуснай, так і пісьмовай (уся праца вядзецца на англійскай мове), веданне іншых замежных моў з’яўляецца перавагай;
- добрае веданне рускай і/або беларускай моў;
- досвед працы ў міжнародных праектах з’яўляецца перавагай;
- высокі ўзровень самаарганізацыі;
- уменне працаваць індывідуальна і ў камандзе, таксама анлайн;
- гатоўнасць да перыядычных камандзіровак.
Умовы:
- офіс у Вільні, але магчыма праца анлайн;
- праца на 0,7 стаўкі (28 гадзін на тыдзень);
- старт працы з 1 жніўня 2024;
- памер заробка абмяркоўваецца на сумоўі.
Важная ўмова: знаходзіцца не ў Беларусі. БНМС “РАДА” не прызнаныя экстрэмісцкім фармаваннем, але наш сайт і сацсеткі прызнаныя экстрэмісцкімі матэрыяламі.
Дасылайце рэзюмэ (на англійскай ці беларускай мовах) да 1 ліпеня з апісаннем вашага досведу працы на адрас [email protected] з тэмай “Міжнародны_ая сакратар_ка”.
