Афлайн-семінар для маладых журналістаў і журналістак

Ты зараз у Еўропе, робіш першыя крокі ў галіне журналістыкі і ўжо сабраў_ла вакол сябе невялікае анлайн-кам’юніці?

Ты б хацеў_ла адтачыць свае журналісцкія навыкі, але ў цябе няма часу на паўнавартаснае навучанне?

International Media Academy IMA з Берліна запрашае маладых беларускіх журналістаў і журналістак на інтэнсіўны 4-дзённы семінар “Стварэнне сетак, абарона інфарматараў” у Варшаве.

Семінар пройдзе з 14 па 17 ліпеня.

Заяўку на ўдзел можна падать анлайн па гэтай спасылцы.

Пасля падзей у жніўні 2020 шмат незалежных журналістаў і журналістак пакінулі Беларусь. Таксама выехалі і журналісты-пачаткоўцы, блогеры і блогеркі, стваральнікі і стваральніцы медыя-кантэнту. Цяпер яны вымушаны асвятляць падзеі і жыццё ў краіне, знаходзячыся за яе межамі. Гэта стварае асаблівыя ўмовы працы. У такіх умовах вельмі важна падвышаць дасведчанасць аб кібер-бяспецы, а таксама працягваць развіваць уласныя медыя-скілы.

Семінар арыентаваны на журналістаў-пачаткоўцаў з Беларусі ва ўзросце ад 18 да +/-25 гадоў.

Тэмы семінара:

• асноўныя аспекты кібербяспекі – у зносінах з калегами і каляжанкамі, інфарматарамі і інфарматаркамі, а таксама на сацыяльных платформах;
• журналісцкія формы і жанры падачы матэрыялу;
• тэхнікі інтэрв’ю;
• крытэрыі незалежнай журналістыкі.

Акрамя таго, на семінары вас чакае:

• практычны блок па асновах аўдыё- і відэажурналістыкі;
• запіс падкаста з прафесійнай тэхнікай;
• крэш-курс па канструктыўнай журналістыцы;
• практычнае заданне.

Вынікі гэтага практычнага задання ўдзельнікі і ўдзельніцы змогуць абмеркаваць на сустрэчы выпускнікоў і выпускніц напрыканцы кастрычніка 2022 года ў Варшаве.

Умовы падчас семінара:

Для ўдзельнікаў і ўдзельніц, якія прыязджаюць з трэцяй краіны, арганізатары аплачваюць выдаткі на праезд і пражыванне. Для ўсіх удзельнікаў і ўдзельніц семінара прадугледжаны грошы на кішэнныя выдаткі і ланчы. Абавязковая ўмова пакрыцця ўсіх выдаткаў і выплата кішэнных грошай – наведванне ўсіх дзён семінара.

Мова семінара: беларуская, руская.

Па ўсіх пытаннях пішыце на [email protected] 

Заяўку можна падаць анлайн, запоўніўшы анкету па спасылцы.

Апошні дзень падачы заявак: 30 чэрвеня 2022 года.

Нягледзячы на тое, што ў форме арганізатары пытаюцца аб узроўні валодання рознымі навыкамі і ведамі, гэта не вызначальны фактар пры адборы заявак. Гэта інфармацыя дапаможа выбудаваць такую праграму семінара, якая ў найбольшай ступені адпавядала б вашым патрэбам.

Арганізатары: International Media Academy IMA у партнёрстве з Медыя Акадэмія. Праект рэалізуецца пры падтрымцы Міністэрства замежных спраў  Германіі.