“Вы здохнеце тут”. Вязні Акрэсціна сведчаць
Пасля фальсіфікацыі выбараў прэзідэнта 9 жніўня 2020 года па Беларусі пачаліся масавыя мірныя пратэсты. Дзеяннямі рэжыму ў адказ стала прымяненне сілавікамі зброі, светла-шумавых гранатаў, слезацечнага газу. Сілавікі масава затрымлівалі і збівалі пратэстоўцаў. Неапраўданая жорсткасць у дачыненні да мірных дэманстрантаў працягвалася і пасля затрыманняў.
Сярод затрыманых былі не толькі непасрэдныя ўдзельнікі пратэстаў. Сілавікі хапалі і непаўнагадовых, людзей пенсійнага ўзросту, людзей з інваліднасцю, а таксама выпадковых мінакоў.
Затрыманых у горадзе дастаўлялі ў розныя ўстановы ўнутраных справаў. У Мінску асноўным месцам утрымання затрыманых стаў Цэнтр ізаляцыі правапарушальнікаў ГУУС Мінгарвыканкама, размешчаны па адрасе 1-шы завулак Акрэсціна, 36 (далей — ЦІП).
За пяць дзён (9–14 жніўня 2020 года) праз ЦІП, разлічаны на ўтрыманне 110 чалавек, сілавікі “прагналі” больш за тры тысячы затрыманых.
Усе затрыманыя траплялі пад прыніжальныя працэдуры пры размяшчэнні ў ЦІП, жорсткае збіццё, утрымліваліся ў нечалавечых умовах у перапоўненых камерах без ежы і вады па двое і болей сутак. Людзей збівалі пры любой спробе высветліць свой статус, патрабаваць выканання сваіх правоў і медыцынскай дапамогі. У збіцці ўдзельнічалі як супрацоўнікі ЦІП, так і сілавікі з АМАПа (відэа са сведчаннямі затрыманых).
13 жніўня 2020 года беларускія праваабаронцы звярнуліся да міністра МУС Юрыя Караева з патрабаваннем спыніць здзекі ў ЦІП і іншых месцах утрымання затрыманых і расследаваць выпадкі катаванняў.
Намеснік кіраўніка МУС Беларусі Аляксандр Барсукоў спачатку заявіў, што “здзекаў ніякіх не было”. На наступную раніцу ён удакладніў, што “ў камеры нікога не збівалі”.
Адначасова з такімі заявамі, затрыманых працягвалі збіваць, пра што маюцца шматлікія сведчанні, у тым ліку, у выглядзе аўдыязапісаў.
У ноч з 12 на 13 жніўня родныя тых, хто ўтрымліваўся ў ЦІП на Акрэсціна, запісалі гукі бесперапыннага збіцця, што было добра чуваць на вуліцы. На запісах чуваць галасы людзей, якія гучна крычаць ад болю і просяць пра літасць.
14 жніўня пачалі масава выпускаць затрыманых. Некаторых вывозілі на машынах хуткай дапамогі. Тыя, хто выйшлі на свабоду, паказалі свае раны і траўмы ад катаванняў.
У аснову гэтага даклада ад Міжнароднага камітэта па расследаванні катаванняў у Беларусі пакладзеная інфармацыя са сведчанняў 101 пацярпелага (1095 старонак дакументаў), якія 9–14 жніўня 2020 года ўтрымліваліся ў Цэнтры ізаляцыі правапарушальнікаў у 1-м завулку Акрэсціна, 36 у Мінску. Для мэтаў публікацыі многія са сведкаў былі апытаныя дадаткова. Таксама эксперты Міжнароднага камітэта па расследаванні катаванняў у Беларусі старанна вывучылі дадзеныя апытанымі медыцынскія і іншыя дакументы.
У гэтай публікацыі ў храналагічным парадку прыводзіцца апісанне знаходжання затрыманых у ЦІП, а таксама ўмоваў, у якіх яны ўтрымліваліся. Фокус зроблены на асноўныя лакацыі: двор ЦІП, дзе людзей выгружалі з аўтазакаў; прагулачныя дворыкі, дзе іх па 2–3 гадзіны і болей трымалі да размеркавання па камерах (некаторыя знаходзіліся там некалькі сутак); камеры і калідоры ЦІП. У любым месцы ізалятара людзі сутыкаліся з жорсткім збіццём, псіхалагічным ціскам і абразамі з боку супрацоўнікаў ЦІП (у тым ліку медыцынскіх супрацоўнікаў), а таксама сілавікоў з іншых падраздзелаў праваахоўнай сістэмы краіны.
Затрыманыя сведчаць пра неверагодную перапоўненасць камераў, у якіх іх утрымлівалі, антысанітарыю і адсутнасць элементарных рэчаў для туалету і гігіены, пітной вады і ежы на працягу некалькіх сутак, нягледзячы на ўсталяваныя нормы і правілы ўтрымання.
Мэтанакіравана ўтрымліваючы людзей у перанаселеных камерах у разгар пандэміі Covid-19, супрацоўнікі ЦІП падстаўлялі пад небяспеку іх здароўе і жыцці. Хворыя і тыя, хто мае патрэбу ў пастаянным прыёме медыцынскіх прэпаратаў, а таксама траўмаваныя і параненыя не атрымлівалі неадкладнай медыцынскай дапамогі, што скончылася цяжкімі наступствамі для здароўя многіх з іх. Хуткую медыцынскую дапамогу затрыманым выклікалі ў выключных выпадках.
Умовы ўтрымання ў ЦІП расцэньваюцца экспертамі Міжнароднага камітэта па расследаванні катаванняў у Беларусі як жорсткія, а ў некаторых выпадках гэтыя ўмовы дасягалі ўзроўню катаванняў.
Масавае збіццё, псіхалагічны і фізічны гвалт з боку супрацоўнікаў сілавых структураў, у тым ліку супрацоўнікаў ЦІП, суправаджалі затрыманых на працягу ўсяго часу іх знаходжання ў ізалятары.
Хуткабежныя суды, якія праходзілі над затрыманымі ў будынку ЦІП, не адпавядалі прынцыпам справядлівага суду. Людзям не давалі магчымасці азнаёміцца з пратаколамі затрыманняў, у многіх выпадках інфармацыя ў іх была няправільная і прыдуманая. У наданні адваката адмаўлялі, часам за гэтае патрабаванне збівалі.
Пры такіх абставінах адлюстраваныя ў гэтым дакладзе дзеянні сілавікоў АМАП і ЦІП ГУУС Мінгарвыканкама ў дачыненні да затрыманых людзей з’яўляюцца злачыннымі як па ўнутраным, так і па міжнародным праве (гл. раздзел Прававая кваліфікацыя дзеянняў супрацоўнікаў праваахоўных органаў).
Аналіз інтэрв’ю пацярпелых і дадатковыя апытанні з мэтай апазнання сілавікоў дазволілі ідэнтыфікаваць некаторых службовых асобаў ЦІП, якія прымалі ўдзел у катаваннях і жорсткім абыходжанні з затрыманымі (гл. раздзел Асобы, адказныя за катаванні затрыманых у Цэнтры ізаляцыі правапарушальнікаў).
З прычыны няспынных рэпрэсіяў у дачыненні да пацярпелых у дакладзе не прыводзяцца іх сапраўдныя імёны і прозвішчы і пазбягаюцца апісанні, з дапамогай якіх можна ідэнтыфікаваць людзей.
Неабходна адзначыць, што жорсткія ўмовы ўтрымання ў ЦІП і стаўленне да затрыманых, якія можна прыроўніваць да катаванняў, са жніўня 2020 года па цяперашні час практычна не змяніліся. Гэта пацвярджаюць шматлікія сведчанні пацярпелых, якія адбывалі адміністратыўныя арышты ў дадзенай установе ў 2021–2023 гадах.
Адным з абуральных прыкладаў катаванняў у дачыненні да затрыманых з’яўляецца факт здзекаў з праваабаронцы Насты Лойка, якая заявіла ў судзе, што 11 лістапада 2022 года адзін з супрацоўнікаў ЦІП вывеў яе ва ўнутраны дворык і пакінуў без верхняй вопраткі на восем гадзінаў. У выніку гэтага Наста моцна захварэла.