Як пачаць прасоўванне асабістага блогу?

Этапы прасоўвання любога прадукта ідуць па аднолькавай схеме. Патрэбны досвед, аналіз аўдыторыі, трохі крэатыву. Таксама выконваць паслядоўнасць дзеянняў, увесь час спрабаваць нешта новае, аналізаваць, што працуе, і працягваць гэта рабіць.

Каб пачаць прасоўванне блогу, трэба задаць сабе тры складаныя і адначасова простыя пытанні:

• Хто вашая аўдыторыя?
• Дзе яна знаходзіцца тэрытарыяльна?
• Як прыцягнуць яе ўвагу?

Каб адказаць на гэтыя пытанні – неабходна прайсці наступныя этапы ў прасоўванні:

• падрыхтоўка;
• прасоўванне;
• аналітыка;
• карэкціроўка.

Падрыхтоўка

Мы аналізуем наш прадукт, мэтавую аўдыторыю, канкурэнтаў_ак, рынак агулам. На глебе гэтага аналізу ўпакоўваем наш прадукт. Таксама пішам усе магчымыя планы.

Прасоўванне

Рэалізоўваем тыя крокі, што былі прапісаныя ў плане, які мы падрыхтавалі на першым этапе.

Аналітыка

Аналізуем вынікі, якія актыўнасці спрацавалі, а якія не. Задаем сабе пытанне, ці варта працягваць працу. Калі ў нас было 10 гіпотэз, што нешта спрацуе, правяраем, якія з гэтых гіпотэз спрацавалі і выкрэсліваем тое, што не спрацавала.

Карэкціроўка

На месца непрацоўных гіпотэз выстаўляем новыя.

Этап падрыхтоўкі больш важны, чым этап прасоўвання, бо ў працэсе імплементацыі нашага медыяплану мы фактычна робім тое, да чаго рыхтаваліся. Як робіцца аналітыка і для чаго? У канкурэнтаў_ак можна падглядзець, пра што яны пішуць, якія маюць поспехі і няўдачы, можна таксама падглядзець тэматыку і фарматы.

Калі канкурэнты_кі буйныя і з маштабнымі праектамі, можна вывучыць, як іх абмяркоўвае аўдыторыя ў каментарах, чаго хочуць ад іх людзі. Нешта з атрыманай інфармацыі можна ўнесці ў свой план.

Мы бачым, што ў самага буйнога нашага канкурэнта_кі 10 тысяч падпісантаў_ак. Варта на гэтым моманце сказаць сабе, што 10 тысяч – гэта максімальныя рэаліі на бягучы час, і скараціць для сябе рэальную мэту да 3 тысяч. Галоўнае ў гэтым не разгубіцца і імкнуцца ў перспектыве да большага. Таксама можна прааналізаваць аб’ём рынка, то бок на якую колькасць падпісантаў_ак мы можам разлічваць.

Пасля ўсяго гэтага можна скласці SWOT-аналіз – назва якога складаецца з наступным словаў:

1. strengths (моцныя якасці);
2. weaknesses (слабыя якасці);
3. opportunities (магчымасці);
4. threats (пагрозы).

Зручна праводзіць такі аналіз у табліцы, якую можна стварыць самастойна. У раздзел “магчымасці” могуць уваходзіць карысныя кантакты. У пагрозы – рызыкі. Пералік рызык спатрэбіцца пры фармаванні ўнікальнай гандлёвай прапановы вашага прадукта і каб не апячыся на нейкіх ненадзейных кантактах альбо метадах прасоўвання.

Ніякае прасоўванне немагчымае без ведаў пра вашую мэтавую аўдыторыю. Можна скласці партрэт спажыўца_вачкі вашага кантэнту, нават можна даць яму_ёй імя. Можна вылучыць аўдыторыю праз шырокі сегмент. Напрыклад, заняткі па электрагітары ў музычнай студыі праводзяцца для падлеткаў, яны – ускосная аўдыторыя, бо плаціць будуць іх бацькі. А значыць, намаганні павінны быць накіраваны на дарослых, у якіх ёсць дзеці-падлеткі.

Упакоўка акаунта

Было б добра, каб ваш прадукт быў зразумелым, а блог можна было б апісаць адным сказам. Бо з улікам  усёй гэтай інфармацыі можна сфармаваць унікальную гандлёвую прапанову, прадукт, які мэтавая аўдыторыя зразумее.

Калі вашыя сябры_кі, калега_данкі просяць патлумачыць, пра што ваш блог – вы не павінны ўступаць у абстрактныя тлумачэнні, у вас павінна быць унікальная гандлёвая прапанова, якая тлумачыцца адным сказам.

Таксама упакаванне прадукта ўключае ў сябе місію, каштоўнасці, tone of voice (мова, на якой мы размаўляем з нашай аўдыторыяй), лексіка, ступень эмацыйнасці (сур’ёзна альбо з гумарам, стрымана альбо разняволена), ці выкарыстоўваем мы фемінітывы, неалагізмы, англіцызмы.

Да фармавання ўпакавання прадукта мы адносім фірмовы стыль. Сёння гэта важна, бо большасць сацсетак заснаваныя на візуальным узаемадзенянні.

Пра візуальную канцэпцыю блогу

Калісьці, на самым пачатку, у сацыяльных сетках не надавалася вялікага значэння карцінкам. Але са з’яўленнем Instagram пачалася эра візуалу, графічнага і фотакантэнту. Са з’яўленнем TikTok відэа – гэта кароль кантэнту. Варта вучыцца мантаваць, рабіць відэакантэнт, менавіта ў фармаце кароткіх відэа. Папулярнасць кароткіх відэа падаць не будзе. Усе аналізы сацыяльных сетак кажуць, што TikTok будзе толькі набіраць папулярнасць. Instagram спрабуе пераняць яго стыль. Нават Youtube увёў фармат вертыкальных відэа Youtube Shorts.

Пасля фармавання прадукта і ўпакавання, перад стварэннем кантэнт-плану і медыястратэгіі мы павінны ацаніць свае рэсурсы, чаго мы хочам і што мы маем. Можа мы маем шмат часу, альбо шмат грошай, альбо вялікі сацыяльны капітал, які дазволіць на пачатку медыякампаніі набраць аўдыторыю. Рэгулярная праца заўсёды дае вынікі. Але калі на блог вы будзеце вылучаць толькі 1 гадзіну на тыдзень –  не варта чакаць высокіх вынікаў.

Пасля ацэнкі рэсурсаў можна складаць кантэнт-план, які павінен змяшчаць у сабе наступныя складнікі:

• што мы плануем публікаваць?
• як часта мы плануем публікаваць?

Кантэнт павінен з’яўляцца рэгулярна, цішыні быць не павінна. Падчас медыя-кампаній блог увогуле павінен “гарэць”, неабходна публікаваць і сторыз, і відэа, і тэксты.

Зрабілі кантэнт-план – пераходзім да медыя-плану:

• тэрміны прасоўвання;
• каналы прасоўвання;
• спосабы прасоўвання.

У медыя-плане мы прапісваем каляндарна, калі і што мы публікуем у рамках нашай рэкламнай кампаніі.

Дрэнная навіна для піяршчыкаў_ыц-пачаткоўцаў: няма чароўнай пілюлі, якая зробіць ваш медыя-прадукт паспяховым. Добрая навіна: можна бясконца эксперыментаваць з медыя-прадуктамі, інструментамі, пляцоўкамі ад кампаніі да кампаніі.

Нешта абавязкова спрацуе, асабліва калі вы канкрэтна акрэслілі місію, каштоўнасці, мэты вашага блога. Калі ён у дадатак прыгожа выглядае – то ўсё запрацуе дакладна.

Поспех любога прадукта складаецца з трох неад’емных элементаў:

• ідэя;
• змест;
• форма.

Усе тры элементы павінны прысутнічаць. І нават калі толькі адзін з гэтых элементаў будзе якасны – гэта ўжо няблага. Напрыклад, бамбічныя тэксты, якія аўдыторыя чакае з нецярпеннем кожны тыдзень. Альбо, напрыклад, добры дызайн. Бывае такая аўдыторыя, для якой не так важная ідэя альбо яна не чытае тэксты, але дастаткова эстэтыкі, каб яе прывабіць. Такая формула можа пасаваць пад піяр музычных мерапрыемстваў.

Агульныя прынцыпы прасоўвання:

• Зразумелы прадукт. Квінтэссэнцыя (ёмістае апісанне) прадукта павінна знаходзіцца ў шапцы блога.
• Сфармаваны брэндбук. У яго уваходзяць: місія, каштоўнасці, tone of voice, фірмовы стыль прадукта.
  
  Фірмовы стыль – гэта камбінацыя візуальных кампанентаў, дзякуючы якім ў аўдыторыі складваецца ўражанне пра ваш брэнд. Гэта фірмовыя колеры, шрыфты, дадатковыя дэкаратыўныя элементы, штрыхі, зоркі, формы, унікальная фактура, фірмовая апрацоўка фатаграфіі ці відэа. Дзякуючы ідэальнаму брэндбуку падпісант_ка павінен_а пазнаваць стыль блога пры праглядзе медыяпрадукту, яшчэ не ўбачыўшы ягоную назву.
  
• Аформлены акаунт. Нельга запускаць рэкламу, таргет ці любую іншую актыўнасць, калі ваш акаўнт пусты. Інакш вашыя высілкі будуць марнымі. Акаўнт завершаны, калі там ёсць апісанне, аватар і хоць адзін пост.

Як толькі ўсе прынцыпы будуць выкананыя, можна пачынаць актыўную піяр-кампанію. Нельга рабіць стаўку толькі на нейкі адзін канал, толькі таргет, ці толькі СМІ. Загадзя павінна быць створана некалькі гіпотэз прасоўвання па розных каналах з дапамогай некалькіх інструментаў, якія будуць адначасова запускацца.

Пасля правядзення піяр-кампаніі праводзіцца аналітыка, высвятляецца, што спрацавала, а што не. Эфектыўныя хады і гіпотэзы  можна выкарыстоўваць бясконца, пакуль яны працуюць.

Каналы прасоўвання

• СМІ.
  Сёння гэты канал абмежаваны. Прасцей з гэтым каналам працаваць тым, хто не знаходзіцца ў Беларусі.
  
• Еmail-маркетынг.
  Можна розным чынам збіраць базу для рассылкі. E-mail можна збіраць як на івэнтах, гэтак і праз анлайн-анкеты.
  
• Influence-маркетынг.
  Гэта спосаб больш актуальны для прасоўвання блогу. Падчас напісання медыя-плану стварыце спіс СМІ, інфлюенсераў_ак па вашай тэматыцы альбо праекты з сумежнай тэматыкай.
  
• Digital-рэклама.
  Што тычыцца блогаў, то больш эфектыўны будзе таргетынг. Тут ёсць некалькі варыянтаў прасоўвання: з дапамогай рэкламы ці спрошчаны варыянт праз кнопку прасоўвання. Таргетынг ратуе асабістыя блогі. Арганічныя спосабы прасоўвання таксама працуюць. Influence-маркетынг можна лічыць арганічным спосабам. Але таргетынг дае менавіта імпульс прасоўванню, які неабходны для паслядоўнага росту блога.
  
• Кантэнт-маркетынг заключаецца ў тым, што мы публікуем той кантэнт, з дапамогай якога мы і прасоўваем яго. Іншымі словамі гэта самарэклама. Добры кантэнт сам сябе прадае. Калі ваш кантэнт нецікавы, неякасны, не адпавядае запытам вашай мэтавай аўдыторыі, то бессэнсоўна яго прасоўваць і ніякія інструменты ці фішкі вам не дапамогуць.
  
• Event-маркетынг. Калі вас запрашаюць як эксперта_ку на нейкае мерапрыемства – не прапусціце магчымасць прарэкламаваць свой блог, раздаць візіткі, спасылкі, QR-код і т.п. Увесь час распавядайце пра сябе, сваім сябрам_кам, каму заўгодна.
  
• Партнёрскія праграмы. Партнёрства можна наладзіць як з арганізацыямі, гэтак і з інфлюенсерамі_камі. Вы можаце сумесна зрабіць серыю сустрэчаў на агульную тэму, нешта абмеркаваць. Гэта можа быць нейкі афлайн івэнт на нейтральнай пляцоўцы, ці вэбінар, ці стрым на вашай пляцоўцы, ці на пляцоўцы суразмоўцы. Так ці інакш, але вы знойдзеце шлях да аўдыторыі вашага партнёра_кі.
  
• У знешняй рэкламе выстаўляйце на афішу ўсе магчымыя спасылкі на вашыя блогі.
  
• Безумоўна важны канал прасоўвання – гэта асабістыя сувязі праз асабістыя профілі, сяброўскія чаты, калі гэта дарэчна і бяспечна, вядома. 

Інструменты прасоўвання

Рэлізы ў СМІ, халодныя рассылкі, гарачыя рассылкі.

Паспрабуйце сабраць базу СМІ і зрабіце па ёй халодную рассылку. Калі вы запускаеце праект і лічыце, што нейкі пост добра будзе глядзецца ў СМІ, то напішыце загадзя прэс-рэліз.

У рамках інфлюенс-маркетынга афармляем рассылку і робім яе. Вядома, усё ў межах разумнага. Пакідаем ёмістае паведамленне на адрас інфлюенсера з канкрэтнай просьбай падзяліцца вашымі матэрыялам. Не пішам раніцай, уначы альбо ў выходныя дні.

Існуюць такія ценявыя, не вельмі легальныя спосабы прасоўвання: мас-фолавінг і мас-лайкінг.

Самі сацсеткі змагаюцца з гэтымі сэрвісамі шляхам банаў профіляў, якія карыстаюцца гэтымі інструментамі. Таму трэба быць асцярожнымі, не злоўжываць такімі спосабамі, але зрэдку можна ўжываць і іх. Калі ваш блог яшчэ зусім маленькі, то непрапарцыйна вялікі мас-фолавінг дакладна створыць вам праблемы. Спачатку лепш рабіць усё ўручную. Проста дадаем незнаёмых нам людзей з фрэнд-стужак інфлюенсераў_ак, ставім ім лайкі і звяртаем на сябе такім чынам увагу. Пажадана, каб вы адчувалі, што гэтыя людзі належаць да вашай мэтавай аўдыторыі.

З’яўляйцеся ў каментарах сумежных з вамі блогаў.

Напрыклад, вы трымаеце феміністычны блог. Ідзеце ў суседні фем-блог і пакідаеце змястоўны камент, сваё меркаванне пад нейкім пастом.

Тэгі, хэштэгі і геаметкі.

Існуе меркаванне, што хэштэгі дапамагаюць патэнцыйнай аўдыторыі выйсці на вас. Калі вашая дзейнасць звязаная з канкрэтнай лакацыяй ці мясцовасцю, стаўце геатэгі. Можаце прыдумаць свой індывідуальны хэштэг. Чым шырэйшы хэштэг, тым складаней будзе вас знайсці па ім, напрыклад #лета, #вясна, #мінск. Лепш прыдумаць хэштэг, які будзе суадносіцца з тэмай вашага паста.

Аптымальна выстаўляць адначасова некалькі хэштэгаў, як шырокіх, гэтак і вузкіх. Калі вам падаецца, што хэштэг да тэксту не вельмі пасуе, замацуйце хэштэг у каментары. Алгарытм ўсё адно будзе працаваць на вас. Ваш пост будзе выдавацца ў пошуку.

Выкарыстанне інфанагодаў.

Ёсць такое паняцце newsjacking – гэта выкарыстанне актуальных навін і інфанагодаў у рэкламе свайго прадукта ці блога для прыцягнення трафіку і павышэння пазнавальнасці. Гэта той самы выпадак, калі кампанія паспела злавіць хвалю хайпа і атрымаць з яе выгаду для сябе.

Гутарка з аўдыторыяй.

Абавязкова рэагуем на ўсе каментары, паведамленні. Калі вы рэгулярна не адказваеце аўдыторыі на каментары, то калі-небудзь яна можа перастаць пісаць. Аўдыторыя, якая не ўзаемадзейнічае з вашым кантэнтам, проста паступова сыйдзе.

Карыстальніцкі кантэнт.

Гэта такі тып кантэнту, калі самі карыстальнікі_цы ствараюць кантэнт, прысвечаны вам і адзначаюць вас у ім. UGC кантэнт – згенераваны карыстальнікамі_цамі – можна разглядаць як сістэму «Кантэнт – Трафік – Кантэнт». Калі вы атрымліваеце ад карыстальніка_цы кантэнт, вы ператвараеце яго ў новы кантэнт і распаўсюджваеце далей. Гэта вельмі зручна, бо кантэнт пра вас, але вы самі не ўдзельнічалі ў яго стварэнні.Т акім чынам аўдыторыя разумее, што вы запатрабаваныя, а чалавек, які стварыў кантэнт пра вас, развівае свой блог і, мажліва, да яго прыйдуць вашыя падпісанты_кі.

Карысныя парады:

– не прападайце з эфіру, рэгулярны посцінг павінен быць, мінімум 1 раз на тыдзень;

– рабіце перапынкі паміж актыўнасцямі, каб разумець іх эфектыўнасць;

– рэагуйце на каментары.