Як стварыць эфектную прэзентацыю, калі вы не дызайнер_ка?
![Як стварыць эфектную прэзентацыю, калі вы не дызайнер_ка?](https://rada.fm/wp-content/uploads/2023/03/sajt-15-3.png)
- Дзе стварыць прэзентацыю?
- Як зрабіць, каб «было прыгожа»?
- Як вылучыць інфармацыю на слайдзе?
Першы слайд у прэзентацыі — гэта першае ўражанне, якое вы ствараеце ў слухача ці слухачкі не толькі пра саму тэму выступу, але і пра вас як лектара_ку. Які_ая я спікер_ка? Гэтае пытанне варта задаць сабе, перш чым садзіцца афармляць прэзентацыю.
Калі збіраецеся прэзентаваць тэму сур’ёзна, прыводзіць навуковыя доказы, то дызайн прэзентацыі таксама варта зрабіць лаканічным і стрыманым (не значыць сумным), а калі весела і з гумарам — адпаведна яскравым і пацешным.
Паглядзіце, як тэма сучаснага мастацтва ўвасобілася ў розных стылістычных варыянтах.
![](https://rada.fm/wp-content/uploads/2021/11/snimok-ekrana-2021-11-23-v-20.36.44-1024x620.png)
Ад 1-й прэзентацыі мы яўна чакаем, што лекцыя будзе цікавай і, галоўнае — карыснай. Прыкладна такія ж чаканні выклікае першы слайд 5-й прэзентацыі, толькі больш з намёкам на навуковую падачу. Вясёлы і матывацыйны аповед чакаеш ад лектаркі на 2-й прэзентацыі, а 3-я і 4-я — відавочна зробленыя ва ўстанове адукацыі, прычым 4-я ніяк не адлюстроўвае тое, пра што будзе гаворка ў прэзентацыі, такім чынам прымушаючы сумнявацца ў кампетэнтнасці лектара_кі.
Так што першым слайдам вы даяце абяцанне, а не толькі анансуеце тое, пра што будзеце апавядаць. І галоўнае тут — не падмануць чаканні аўдыторыі, бо правальнае першае ўражанне згладзіць не так проста.
Дзе стварыць прэзентацыю?
У першую чаргу вам неабходна выбраць інструмент, у якім будзеце працаваць. Лепей за ўсё для стварэння прэзентацый падыходзяць Powerpoint, Keynote, Canva, Crello, Prezi, Tilda.
Рэкамендуем не карыстацца стандартнымі шаблонамі, напрыклад, у Powerpoint: яны не толькі часта састарэлыя, але і надта агульныя, а значыць, не змогуць адлюстраваць характару вашай прэзентацыі. Бясплатна і легальна шаблоны можна спампаваць:
- Gumroad.com. Наладзьце фільтр free+powerpoint. Калі захочаце ўнутр праекта, у графе «кошт» пазначце 0. Шаблон прыйдзе на пошту.
- 24slides.com. Шаблоны даступныя пасля рэгістрацыі на сайце.
- Free-powerpoint-menplates.com
- Smiletemplates
Як зрабіць, каб «было прыгожа»?
Памятайце, што няма прыгожага і непрыгожага дызайну, ёсць той, што пасуе, і той, што не пасуе. Але каб дамагчыся візуальнай суладнасці, палепшыць успрыманне тэксту, выконвайце пэўныя правілы.
Гуляйцеся са шрыфтамі
У любога шрыфту ёсць характар, які можна падабраць пад агульны характар прэзентацыі.
Праграмы звычайна прапаноўваюць стандартны шрыфт тыпу Arial або Times New Roman — іх адразу варта замяніць на прыемны і добра чытэльны. Вядома, Times New Roman — акуратны і добра чытаецца, але вы рызыкуеце не пазбавіцца ад яго канцылярскага налёту.
Параўнайце на малюнках ніжэй: які шрыфт выглядае больш бадзёра? Відавочна, што правы болей сучасны, а левы (Times New Roman) нібыта толькі хоча такім падавацца.
![](https://rada.fm/wp-content/uploads/2021/11/9-1-1024x439.png)
Дзе ўзяць шрыфты? Існуе многа бясплатных рэсурсаў, якія прапануюць шрыфты як для асабістага, так і для камерцыйнага выкарыстання: толькі правярайце ўмовы, перш чым спампаваць які-небудзь шрыфт. Раім скарыстацца:
![](https://rada.fm/wp-content/uploads/2023/03/120-1024x439.png)
![](https://rada.fm/wp-content/uploads/2023/03/121-1024x439.png)
![](https://rada.fm/wp-content/uploads/2023/03/sajt-15-2-1024x439.png)
Сачыце за памерам тэксту і выроўніваннем
На адным слайдзе памер тэксту павінен быць або аднолькавы, або заўважна розны, каб чытачы і чытачкі адрознівалі галоўныя і другасныя элементы.
Параўнайце, як успрымаецца левы слайд, дзе памер шрыфту адрозніваецца нязначна і выкарысталі рознае выроўніванне, і адфарматаваны правы. Злева лёгка згубіцца, праўда?
![](https://rada.fm/wp-content/uploads/2021/11/10-2-1024x439.png)
Выкарыстоўвайце адзін (рэдка два) тыпы выроўнівання тэксту на адным слайдзе.
Напрыклад, увесь тэкст можна размясціць па левым краі або па цэнтры, альбо загаловак па цэнтры, а астатні тэкст па левым краі, але выроўніваць розныя кавалкі тэксту рознымі спосабамі не варта.
Часам можна выратаваць слайд, проста зрабіўшы аднолькавай вышыню кегля і адкарэктаваўшы вылучэнне.
Як вылучыць інфармацыю на слайдзе
Існуе шмат спосабаў вылучыць тэкст у прэзентацыі, галоўнае — не «вырабляцца», то-бок не перабольшыць. Вылучаць тэксты варта акуратна, не карыстацца мноствам розных колераў, падсвечваць.
1. Карыстайцеся адным (максімум двума) тыпамі вылучэння на слайдзе.
Мяшанка з розных вылучэнняў тэксту на адным слайдзе не дапамагае звярнуць увагу на важныя дэталі, а наадварот — ускладняе ўспрыманне.
А найгоршую службу вам саслужаць «эфекты», напрыклад, абводкі і цені. Гэта састарэлыя прыёмы, якія да таго ж перашкаджаюць чытанню.
Каб вылучыць тэкст, можна выкарыстоўваць: падкрэсліванні, напаўтлусты нарыс (класіка), курсіў, моцнае разрэджванне літар, каляровы фон (плашкі), рамачкі, колеравае вылучэнне, іконкі (маленькія піктаграмы ў тэксце), знак з вынасам (NB!), Caps Lock — калі вылучыць трэба асобныя словы або невялікі кавалак тэксту.
Ніколі не выкарыстоўвайце для вылучння тэксту: абводку, каляровую абводку, «святлафор» (абводку рознымі колерамі), многа Caps Lock’а, іншы шрыфт унутры абзаца.
2. Вылучанага тэксту павінна быць значна менш, чым нявылучанага.
Каб падабраць колеры, якія ўдала лягуць у вашую асноўную палітру, скарыстайцеся сэрвісамі: color.romanuke.com, coolors.co, colorsafe.co, color.adobe.com.
3. Бярыце малюнкі добрай якасці.
Для ілюстрацыі прэзентацый выдатна падыдуць фатаграфіі з бясплатных, якасных стокавых рэсурсаў, напрыклад, pixabay.com, freepik.com, search.creativecommons.org, unsplash.com, freeimages.com, flaticon.com (іконкі).
Шукаць і спампоўваць выявы можна ў шырокім дыяпазоне тэм. Калі якасць малюнку неабходна палепшыць, скарыстайцеся letsenhance.io.
4. Каманда «Паветра!»
![](https://rada.fm/wp-content/uploads/2021/11/11-2-1024x439.png)
Пакідайце заўважныя палі з усіх чатырох бакоў. А тэксту на слайдзе павінна быць не болей, чым вы зможаце прачытаць за адзін выдых. Гэтае правіла асабліва актуальнае для прэзентацый, якія вы расказваеце, бо чалавек не можа слухаць і чытаць адначасова.
Тэксту на слайдзе павінна быць столькі, каб вы змаглі прачытаць яго за адзін выдых.
Калі ж вы толькі рассылаеце прэзентацыю, то на слайды можна дадаць болей тэксту, але захапляцца не варта: выберыце самае галоўнае.
Цікавы трэнд, які перакачаваў з інстаграма — рабіць прэзентацыю па тыпе каруселі. Наратыў у такіх прэзентацыях будуецца так, нібыта чалавек чытае гісторыю. Таксама ў трэндзе анімаваныя прэзентацыі, для стварэння якіх, вядома, патрэбны пэўны навык.
5. Вытрымлівайце агульны стыль.
Прааналізуйце і знайдзіце, на чым заснаваны стыль, якія элементы паўтараюцца, або стварыце яго. Старайцеся камбінаваць іх па-рознаму на розных слайдах, чаргуйце.
Паглядзіце, як працуюць элементы ў прэзентацыі пра экалагічнае спажыванне: ты я ж чорныя і зялёныя прастакутнікі, белы фон, малюнак на блакітным фоне, але скамбінаваныя па-рознаму, яны ствараюць адчуванне цэласнасці і суладнасці, і пры гэтым не даюць засумаваць.
![](https://rada.fm/wp-content/uploads/2021/11/15-1024x439.png)
Хочаце пад канец правіла, якое дазволіць ніколі не памыляцца ў лагічным выбудоўванні выявы?
Яно называецца правіла прыбліжанасці, або тэорыя блізкасці, і гучыць так: чым болей элементы звязаныя па сэнсе, тым болей яны павінны быць звязаныя візуальна ў параўнанні з іншымі.
У наступным прыкладзе наўрад ці можна зразумець, якая выява да якой кавы адносіцца, а значыць, задумка рэкламы правалілася.
![](https://rada.fm/wp-content/uploads/2021/11/16-1024x439.png)
Абавязкова вытрымлівайце адлегласць. Блокі інфармацыі, звязаныя адзін з адным, групуйце, а паміж незвязанымі пакідайце «паветра».