Адаптаваць ці не адаптаваць?

Прывычныя нам СМІ як з’ява адыходзяць на другі план: людзі ўсё радзей чытаюць газеты, часопісы і нават электронныя парталы. Цяпер мы хутчэй пойдзем па навіну ў Telegram, а па “часопісную” гісторыю — у Instagram. Інфлюэнсары_кі і лідары_кі меркаванняў сталі новымі медыя. А сацыяльныя сеткі — іх (і нашай) галоўнай платформай.

Сацыяльныя сеткі цяпер нашмат болей чым проста маркетынгавы інструмент — яны з’яўляюцца сродкамі сувязі з аўдыторыяй, выражэння і прасоўвання ўласнай пазіцыі. Але як зразумець, якая сацыяльная сетка дапаможа нам больш эфектыўна выходзіць на нашую мэтавую аўдыторыю? Што рабіць, калі хочацца ахапіць адразу некалькі пляцовак? У гэтым артыкуле раскрыем тэму адаптацыі кантэнту пад розныя пляцоўкі і раскажам, у якой сацсетцы знаходзіцца вашая аўдыторыя і як з ёй размаўляць.

Як і куды публікаваць?

Для таго каб разумець, які кантэнт публікаваць або як яго адаптаваць, важна зразумець, дзе “жыве” вашая аўдыторыя.

У большасці выпадкаў вашая мэтавая аўдыторыя (МА) будзе падобная да вас. Хутчэй за ўсё, у вас блізкія інтарэсы, каштоўнасці і бэкграўнд — падобнае прыцягвае падобнае.

У сацыяльных сетках, як і ў жыцці, людзі шукаюць людзей падобных да сябе або тых, хто матывуе на дасягненне лепшага. Таму адказ на пытанне, дзе жыве вашая аўдыторыя, пашукайце у сабе: “А дзе я бяру інфармацыю?” Таксама вам лягчэй будзе працаваць з сацыяльнымі сеткамі, якімі вы часта карыстаецеся.

Крыху ніжэй распавядзем, якія пляцоўкі выбіраюць розныя сегменты МА.

Аднак проста знайсці пляцоўку недастаткова. Кожная сацыяльная сетка мае свае асаблівасці. Напрыклад, усе мы ведаем, што Twitter карыстаюцца ліберальна настроеныя людзі, якім абы паспрачацца пра свежыя навіны або паглядзець мемы з коцікамі.

А што з Facebook і Instagram? Ці заляціць вашае відэа пра цяперашнія перамены ў новых дэмакратычных сілах у таргет, калі яно на беларускай? Для гэтага важна дакладна разумець, чаго хочацца аўдыторыі розных пляцовак і якія абмежаванні маюць даступныя інструменты.

Telegram

Telegram — гэта mix-фармат, там ёсць шмат альтэрнатыўных інструментаў. Гэта ўніверсальная пляцоўка, якая аб’ядноўвае і сацсетку, і мэсэнджар, і рассылкі.

Telegram вельмі прыкладны, але пасуе не для ўсіх задач.

Калі вы не СМІ, то для прыцягнення аўдыторыі на сайт Telegram не падыдзе. У вас будзе пэўны трафік, але вы выдаткуеце занадта шмат рэсурсаў. Каб дасягнуць такой мэты, на сайце павінна штодзень выходзіць шмат кантэнту.

У Telegram можна павысіць пазнавальнасць НКА, калі ўзаемадзейнічаць з іншымі каналамі і публікаваць экспертную інфармацыю. Важна, каб яна падавалася зразумелай мовай, каб вашай дзейнасцю маглі зацікавіцца нават тыя, хто не чуў пра трэці сектар. Для гэтага карысна супрацоўнічаць з капірайтарам_кай.

Таксама ў Telegram можна прасоўваць праблематыку дзейнасці НКА. Можна стварыць канал мерапрыемства, якое вы рэгулярна праводзіце: напрыклад, штогадовага форуму.

Facebook vs УКантакце

Facebook найбольш зручны и прасунуты інструмент для развіцця арганізацыі. Таксама камфортна сачыць за іншымі актарамі грамадзянскай супольнасці.

• Просьбы пра дапамогу і дабрачынныя зборы — у Facebook. УКантакце цалкам закрыў усе магчымасці збору сродкаў.
• Розніца атмасфер. У Facebook заўсёды можна падняць хайп з-за настроенасці аўдыторыі на абмеркаванне.
• На Facebook важна асобна запампоўваць кантэнт з іншых сацыяльных сетак або блога арганізацыі. Гэтая пляцоўка не любіць, калі трафік накіроўваецца ў пабочныя крыніцы. 
• На Facebook людзі гатовыя чытаць лонгрыды, таму вы можаце смела размяшчаць іх тут. Відэа таксама добра працуюць. Пакіньце кароткія тэксты для Twitter і мемы для Instagram. Для Facebook патрэбнае нешта больш сур’ёзнае і натхняльнае. 

УКантакце

• Лента навін ва УКантакце: “шчырасць”, якая не ўсіх усцешыць. Уся інфармацыя з вашых падпісак заўсёды публікуецца ў стужцы. З-за гэтага нейкі кантэнт абавязкова губляецца. На жаль, змагацца з гэтым можна толькі таргетам або надзеяй, што пры чыстцы падпісак вашая МА абавязкова пакіне падпіску на вас.
• Пошук УКантакце — шукаецца ўсюды, усё, і ніхто/нішто не схаваецца ад пошуку. Вы маеце вялікі шанец аказацца заўважанымі на пачатковых этапах станаўлення арганізацыі.
• Рэклама УКантакце: нашмат больш крутая і зразумелая. Добра працуе таргет. У Facebook працэс наладкі рэкламы патрабуе пэўнага досведу і навыкаў з-за складанасці інструмента.
• Алгарытмы УКантакце болей наратыўныя — што вам падабаецца згодна з адзнакамі “Падабаецца”, тое вам і паказваюць часцей і больш.

Instagram

Instagram — лідар па колькасці ўнікальных аўтараў. З-за высокай канкурэнцыі за сэрцы (лайкі) аўдыторыі вам трэба болей, чым на любой іншай платформе размяшчаць якасны візуальны кантэнт і ствараць аднародную стужку для прыцягнення аўдыторыі. Калі ў брэндзе вашай арганізацыі і пазіцыянаванні ён — найбольш адметная частка, Instagram акурат самы прыдатны інструмент.

Платформа прапаноўвае некалькі спосабаў узаемадзеяння з аўдыторыяй:

• Публікацыі
• Stories
• Reels

Stories папулярныя ў Instagram, таму што гэта хуткі спосаб даведацца, што адбываецца з любімымі арганізацыямі і цікавымі людзьмі. Яны маюць кароткі фармат і мноства інструментаў, каб завабіць аўдыторыю: апытанні, рэйтынгі і пытанні. Стужка stories працуе ў храналагічным парадку, а значыць, трапіць у поле зроку карыстальніка яшчэ прасцей, чым у стужку пастоў. Дастаткова публікаваць іх некалькі разоў на дзень. Але для іх таксама важная якасць, а не колькасць.

Адаптаваць ці не адаптаваць?

Разабраўшыся з пляцоўкамі, час пераходзіць да кантэнту. Калі вашая аўдыторыя выкарыстоўвае адразу некалькі пляцовак і вы хочаце займець іх увагу і падтрымку ў розных сацыяльных сетках, адаптацыя кантэнту стане вельмі важным аспектам. 

Мы ніколі нічога не пішам у сацыяльных сетках проста так. Таму першае пытанне, якое неабходна задаць сабе: “Што ў нас за мэта? Дзеля чаго мы вядзем сацсеткі?”

Прапануем пачаць вызначаць мэты згодна з методыкай SMART:

S — specific (канкрэтная)

M — measurable (вымяральная)

A — attainable (дасягальная)

R — relevant (актуальная)

T — time-bound (абмежаваная ў часе) 

Прыклады:

Выгадаваць акаўнт у TikTok да 10000 падпісчыкаў_чыц праз 5 месяцаў без выкарыстання платнай рэкламы.

На шляху да адаптацыі:

1. Вызначаем, на якую аўдыторыю будзе разлічаны кантэнт. Асноўныя сацыяльныя сеткі выбіраем, зыходзячы з параметраў аўдыторыі. Гэта могуць быць адна-дзве або тры пляцоўкі. Заўсёды спачатку думаем пра аўдыторыю, а потым пра платформу.
2. Калі мы маем тры розныя сегменты і мы разводзім іх па розных сацыяльных сетках, то адну і тую ж тэму пад гэтыя сегменты мы будзем развіваць, абапіраючыся на розныя тэзісы з іншым tone of voice (стылем апавядання). 
3. Калі ж МА аднародная і мы абралі некалькі сацсетак для павелічэння пакрыцця аўдыторыі, неабходна раздзяліць альбо тэмы, альбо фарматы. Напрыклад, у Instagram публікуем толькі кейсы, а ў Telegram — карысныя дакументы, якія можна спампаваць і карыстацца. 

Часцей за ўсё вашая МА чытае вас на розных пляцоўках. Вы заваюеце нашмат большы давер, робячы своеасаблівы крос-маркетынг (з перасылкай з адной сацсеткі ў іншую).

Будзьце рэлевантнымі. Размаўляйце са сваёй МА. Думайце пра сваю МА. І ў вас абавязкова атрымаецца стварыць добрую медыяпрысутнасць для сваёй арганізацыі, якую б пляцоўку вы ні абралі.