Як ствараць візуал з дапамогай Canva?

• Выбіраем шаблон і фон
• Дадаем тэкст
• Падбіраем элементы
• Праца з фатаграфіямі
• Як стварыць анімацыю ў Canva?
• Як адаптаваць выяву ў Canva?
• Захаванне

---

Canva — універсальны інструмент для стварэння брэндаванага візуалу. З яго дапамогай зручна ствараць ілюстрацыі для відэа, інфаграфіку, рыхтаваць штогадовыя і штомесячныя справаздачы, рэзюмэ, фірмовыя бланкі, подпісы ў электронным лісце. На апошнія два пункты звярніце асаблівую ўвагу, бо гэта асноўныя элементы бясплатнай рэкламы. 

Інтэрфэйс Canva даволі просты і інтуітыўна зразумелы.

Калі зойдзеце на сайт, вам адразу прапануюць выбраць шаблон, зыходзячы з таго, для чаго вы ствараеце візуал.

У Canva паводле змоўчання ўсталяваныя памеры шаблонаў, аднак калі вам патрэбны свой, напрыклад, для сайта або гугл-анкеты, для новых параметраў пастоў у сацсетцы, тут таксама можна яго замовіць.

У асноўным меню зверху выбіраеце «Памер, які наладжваецца», выбіраеце распазнаванне і памернасць.

Пасля таго як выбралі патрэбны шаблон, Canva накіруе вас у працоўнае меню з чыстым аркушам справа, дзе і будзеце ствараць візуал, і з функцыянальным меню злева, дзе можна абраць інструменты.

Чыстых аркушаў можна ствараць колькі заўгодна. Але калі вам трэба зрабіць серыю слайдаў у адным стылі, то раім стварыць гэты стыль на адным аркушы, і толькі потым прадубляваць яго на астатнія. Асобны чысты аркуш зручна таксама выкарыстоўваць як чарнавік і скідваць туды элементы. Аднак пра гэта крыху пазней.

Выбіраем шаблон і фон

Гатовых шаблонаў сэрвіс прапаноўвае вельмі шмат, а фон пэўнай тэматыкі можна таксама падабраць у «Пошуку».

Выбраць можна па любой тэме, напрыклад, «прырода», «эканоміка», «каранавірус», «конкурс» і г.д.

Калі карыстаецеся Canva даўно, сэрвіс падбірае шаблоны, якія спалучаюцца з вашымі папярэднімі запытамі. Шаблоны асабліва зручныя, таму што складаюцца з элементаў, большасць з якіх можна рэдагаваць.

Напрыклад:

Падбіраць колер

Мяняць памер

Для гэтага вам трэба вылучыць элемент і пацягнуць за яго краі.

Мяняць празрыстасць

Выбіраць гатовы шаблон, вядома, не абавязкова: выкарыстоўваць іх можна і як крыніцу натхнення. Калі хочаце пабудаваць візуал з нуля самастойна, можна проста падабраць колер фону (кнопка ў левым верхнім куце працоўнай вобласці).

Дадаем тэкст

Клікніце па інструменце «Тэкст» у меню злева і выбірайце патрэбны шрыфт.

У Canva шрыфты згрупаваныя па спалучальнасці: можна выбраць адразу групу для загалоўка, падзагалоўка і асноўнага тэксту. Аднак гатовую групу выбіраць не абавязкова.

Сакрэт, пра які мала хто ведае!

Вылучыце ваш тэкст. У верхняй панэлі інструментаў з’яўляюцца “Эфекты”. Гэта эфекты, якія вы можаце прыкласці да вашага тэксту — зрабіць яго неонавым, дадаць цень або закругліць.

Падбіраем элементы

«Элементы» — самае сакавітае, што прапаноўвае дызайн у Canva. Звярніце ўвагу, што ёсць бясплатныя элементы, а ёсць пазначаныя надпісам pro, то-бок даступныя толькі ў платнай версіі сэрвісу.

Элементы па канкрэтных тэматыках таксама можна знайсці праз пошук.

Элементы падзеленыя на:

• лініі і фігуры,
• графіку,
• музыку,
• відэа,
• дыяграмы,
• рамкі.

Выкарыстоўвайце іх нестандартна. Напрыклад, злёгку зменшыўшы празрыстасць фігуры, можна зрабіць з яе стылёвую падложку пад тэкст. Як гуляцца з элементамі, залежыць ад вашага ўяўлення і мэтавага дызайну.

Любыя элементы, уключаючы тэкст, можна згрупаваць, каб працаваць з імі як з цэльным аб’ектам, або, калі яны згрупаваныя на зыходным шаблоне, разгрупаваць і мяняць як вы пажадаеце.

Не забудзьцеся, што на некаторых брэндаваных візуалах лепей дадаць лагатып вашай арганізацыі. Вы можаце загрузіць яго праз асноўны экран Canva ў раздзеле «Фірмовы стыль». Там жа можна выбраць карпаратыўныя колеры і шрыфты. Вядома, лагатып можна загрузіць у працоўным меню праз «Загрузкі», аднак у «Лагатыпах» ён будзе заўсёды пад рукой.

Праца з фатаграфіямі

У Canva можна як загрузіць свае выявы, перайшоўшы ў пункт меню «Загрузкі», альбо выбраць фота з фотастоку сэрвісу ў пункце меню «Фота».

Сэрвіс прапаноўвае магчымасць адрэдагаваць любое фота. Калі вы яго загрузілі, у акенцы зверху будуць прапанаваныя опцыі для працы з выявамі: базавыя наладкі, фільтры, эфекты, размыццё… Можна нават выдаліць фон! Прычым сэрвіс зробіць гэта аўтаматычна, вам не трэба самастойна аддзяляць аб’екты на фота, як у Photoshop (гэтыя опцыі ёсць толькі ў Pro-версіі). 

Гэтая функцыя вельмі зручная, калі вы размяшчаеце на афішы чыйсьці фотаздымак.

Дастаткова дадаць фота ў “Загрузкі”, перанесці яго на працоўную прастору, а затым націснуць “Выдаленне фону”.

Важны момант: лепей выбіраць фота з аднатонным фонам, каб праграма змагла якасна “выразаць” чалавека.

Як стварыць анімацыю ў Canva?

Кароткія дынамічныя анімацыі цяпер у трэндзе як у пастах, гэтак і ў сторыс. Можна дадаць з’яўленне тэксту або элементаў, а таксама зрабіць паўнавартаснае міні-відэа або гіфку.

Вы можаце знайсці частку анімацый у «Элементах».

Каб зрабіць ваш тэкст анімаваным, вам неабходна клікнуць на тэкст і перайсці ў опцыю «Анімацыя», якая з’явіцца ў працоўным меню зверху. Захоўваць дынамічныя элементы ў Canva можна як у mp4, так і ў gif.

Сэрвіс дае магчымасць зрабіць таксама пакадравую анімацыю. Для гэтага стварыце столькі старонак, колькі патрэбна, і змяняйце іх напаўненне, як у кадры. Затым абярыце працягласць паказу кожнага «кадру» і спампуйце ўсе старонкі ў gif або mp4. Так вашы кадры захоўваюцца ў адным файле. 

Як адаптаваць выяву ў Canva?

Калі вашая афіша гатовая і яе трэба адаптаваць, напрыклад, для сторыс і пастоў, няма неабходнасці рабіць усё з нуля на кожным шаблоне (пра важнасць адаптацыі мы гаворым у гэтай лекцыі).

Для адаптацыі выберыце неабходную мэту (публікацыя, пост і г.д.), скапіюйце ўсю інфармацыю з пачатковага дакумента і ўстаўце ў новы. Далей — размяшчайце элементы такім чынам, як таго патрабуе фармат. 

Захаванне

Захоўваць выявы Canva прапаноўвае ў разнастайных графічных і анімацыйных фарматах. Калі выява або серыя выяваў гатовыя, націсніце «Спампаваць» у правым верхнім куце і выбірайце фармат, памер, а ў платнай версіі можна таксама выбраць опцыю «празрысты фон».

Гатовыя дакументы заўсёды захоўваюцца ў вашым профілі ў раздзеле «Мае дызайны». Пры неабходнасці да іх можна вярнуцца, падправіць або стварыць новы візуал на іх падставе.   

Карыснасці

Canva прапануе падрабязныя навучальныя артыкулы на тэмы маркетынгу, дызайну і фатаграфіі. Вы можаце іх знайсці ў шапцы сайта ў графе «Навучанне».