Асабісты брэнд: з чаго пачаць
Праца з асабістым брэндам і, увогуле, любая эфектыўная задума пачынаецца з мэтапакладання. Калі вы толькі пачынаеце свой шлях ў блогінгу і не разумееце, чаго вы хочаце дасягнуць, то, хутчэй за ўсё, у вас нічога не атрымаецца. Вы дакладна павінны разумець, з якой мэтай вы робіце свой блог.
Мэты фармуюцца па SMART-крытэрах:
- мэта павінна быць канкрэтнай;
- вымяральнай;
- рэальнай;
- актуальнай, павінна захопліваць;
- абмежаванай па часе.
Калі вы не разумееце, куды вы ідзеце, то хутчэй за ўсё прыйдзеце кудысьці не туды. Калі мы хочам па навігатары кудысці даехаць, мы выстаўляем маршрут з кропкі А ў кропку Б, каб ён мог пракласці нам шлях. Тое ж самае ў нашым жыцці, у нашай дзейнасці.
Ваша задача пасля выстаўлення мэтаў – падумаць, якая будзе канцэпцыя блога. Яна павінна быць унікальнай і шчырай для вас, у першую чаргу, каб вы маглі чэрпаць матывацыю ўнутры сябе.
Людзі, якія займаюцца блогінгам, разумеюць, што гэта яшчэ адна сур’ёзная праца. Аўдыторыя будзе вам часткова даваць рэсурс і матывацыю. Але асноўная матывацыя ўсё ж унутраная. І калі вы самі сябе не падманваеце, то ўнутраная матывацыя будзе выпрацоўвацца спраўна.
Трэцім крокам мы вызначаем свае моцныя бакі. Каб абапірацца на моцныя бакі, натуральна, – іх трэба вызначыць. “Недахоп” моцных бакоў складаецца з таго, што людзі звычайна не цэняць іх, таму што гэтыя якасці праяўляюцца лёгка. Яны не патрабуюць звышвысілкаў. А значыць, што ў нас увогуле няма ніякіх падставаў гэтым ганарыцца.
Напрыклад, калі я класна пішу, у мяне ствараецца ўражанне, што гэта так лёгка і зразумела, што хутчэй за ўсё ўсе навокал умеюць рабіць гэта такім жа чынам. І я не ўспрымаю гэта годна, як свой унікальны атрыбут. Што з гэтым рабіць? Каб глядзець на сябе аб’ектыўна – трэба глядзець на сябе з абодвух бакоў – знутры і звонку.
Псіхалагіня, спецыялістка па кагнітыўна-паводніцкай тэрапіі і аўтарка кнігі «Сіндром самазванца» Сэндзі Ман раіць завесці табліцу, каб навучыцца бачыць свае заслугі.
У першым слупку трэба запісваць дасягненні, але толькі ў выглядзе сухіх фактаў. У другім – тое, што мы пра іх думаем, чаму адчуваем сябе самазванцамі_камі ў канкрэтным выпадку. У трэцім – якія нашы дзеянні, асабістыя якасці і навыкі дапамаглі дасягнуць выніку з першага слупка. Затым трэба дадаць у слупкі 2 і 3 верагоднасць таго, што гэтая версія справядлівая, аб’ектыўная.
У выніку такога аналізу стане відавочна, што вашыя поспехі і дасягненні – па большай частцы вынік вашых намаганняў, а не шчаслівай выпадковасці.
Пасля таго, як мы прапрацавалі свае моцныя бакі, далей мы вывучаем сваю мэтавую аўдыторыю і робім сваё пазіцыяванне.
Вы павінны ўяўляць ядро сваёй мэтавай аўдыторыі. Сканцэнтруйцеся на партрэце свайго ідэальнага чытача_чкі альбо кліента_кі. Вы можаце ўявіць гэтага чалавека, калі ён ёсць у вашым асяроддзі. Апішыце яго, чым ён_яна цікавіцца, як бавіць час, што чытае і чаму, з якімі людзьмі гутарыць. Складзіце партрэт як мага больш падрабязна для таго, каб падчас стварэння кантэнта вы гэтага чалавека трымалі перад вачыма. Тады вашыя пасланні будуць максімальна адраснымі і напоўненымі энергіяй.
Пасля таго, як мы прапрацавалі ўзровень сваёй аўдыторыі, нам важна разабрацца з пазіцыяваннем. Можа здацца, што гэта такі дастаткова вузкаспецыялізаваны тэрмін з маркетынгу, але, насамрэч, – не.
Пазіцыяванне, калі сцісла, – адказвае на пытанне, чаму менавіта вы. Вы дакладна павінны адказаць на пытанне, чаму ваша мэтавая аўдыторыя альбо ваш ідэальны_ая кліент_ка павінен_а падпісацца на вас, чаму ён_яна павінен_а выдаткоўваць час на вас. Чаму ён_яна павінен_а рабіць рэпосты менавіта вашыя.
Для таго, каб мы сфармавалі пазіцыяванне, вы можаце запісаць:
“Дапамагаю: каму, чым, адрозненні, вынікі, карысць”. Напрыклад: я дапамагаю пэўным людзям, напрыклад, прадпрымальнікам_цам, будаваць асабісты брэнд з дапамогай маёй аўтарскай методыкі, якая была выпрабаваная на беларускіх і замежных прадпрымальніках_цах шмат гадоў, якія павялічвалі свае прыбыткі ў дзясяткі разоў для таго, каб людзі смялей праяўлялі сябе.
Пазіцыяванне ствараецца для таго, каб аўдыторыя разумела, чым вы адрозніваецеся ад усіх астатніх людзей. У нашым выпадку – блогераў_ак. Для таго, каб гэта адрозненне закласці ў сваё пазіцыяванне і трансляваць у свет, яго можна адаптаваць і, напрыклад, інтэграваць у шапку профілю, зрабіць нейкія медыякіты, упісаць яго ў лістах да СМІ.
І самае галоўнае, пра што вы павінны памятаць, – пазіцыяванне варта рабіць не для сябе, а для таго, каб ваша аўдыторыя разумела, якую карысць яна атрымае ад узаемадзеяння з вамі, то бок для чаго вы людзям патрэбны. Калі казаць тэрмінамі, то пазіцыяванне – гэта кароткая фармулёўка вашай унікальнасці, якая закрывае патрэбы вашай мэтавай аўдыторыі, але пры гэтым дапамагае вам дасягаць вашых мэтаў.
Для таго, каб быць асобай цікавай, вельмі мала паказваць сябе толькі з аднаго ракурсу. Чым лепш будуць прапрацаваныя ракурсы, яны ж грані брэнда, тым больш рэльефным і шматгранным, а, значыць, і цікавым, будзе ваш вобраз.
У некаторых людзей, якія прымаюць рашэнне ісці ў блогінг, спрацоўвае страх і ўзнікае пытанне: “Гэта мне прыйдзецца ледзь не майткі навыварат выварочваць, каб быць цікавым_ай?” – ні ў якім выпадку! Дзякуючы граням вы самі вырашаеце, пра што распавядаць у сваім блогу. Вы самі рэгулюеце дыстанцыю, наколькі блізка да сябе дапускаць аўдыторыю.
Калі ў нас сфармавана канцэпцыя блогу, калі мы разумеем, на каго яна разлічаная, калі мы разумеем, пра што мы хочам пісаць, што нам дае драйв, мы абіраем інструменты піяра для блогінгу. Усе папярэднія крокі больш унутраныя, а піяр – гэта прасоўванне, праца са знешнім светам. Як сябе маштабаваць, папулярызаваць і рабіць так, каб да вас прыйшло больш людзей.
Асноўныя інструменты піяру
Інфармацыйныя нагоды
Калі для піяру мы адпраўляем у СМІ нейкую інфармацыю альбо блогерам_кам прапаноўваем паўдзельнічаць у нейкім мерапрыемстве або акцыі – яна павінна ўтрымліваць у сабе нейкую падзейнасць. Падзейнасць азначае, што на гэтым мерапрыемстве павінна адбыцца нейкая падзея. Было ўсё спакойна, а тут ўсё закруціцца, нешта здарыцца. Ваша мэта – глядзець на ўсё, што здараецца ў вашым жыцці, праз прызму магчымага кантэнту. Трэба шукаць падзеі ў сваім жыцці і трансляваць іх на сваю аўдыторыю, улічваючы грані, якія вы вызначылі. Чым больш падзейнасці, тым больш дынамікі. Чым болей дынамікі, тым складаней аўдыторыі пераключыцца з вас на некага іншага.
Ваў-праекты
Вы можаце ствараць праекты, якія ў вашай аўдыторыі будуць выклікаць ваў-рэакцыю. Увогуле, у праекта ёсць пачатак, кульмінацыя і канец. Вы штосьці зрабілі, напрыклад фотавыставу, фотасэсію, нейкі выступ, перфоманс, што заўгодна. Калі ў вашай мэтавай аўдыторыі гэта выклікае моцную рэакцыю, яна будзе гэта абмяркоўваць.
Перавагі праектаў:
1. праекты з’яўляюцца вельмі добрай дапамогай для абмеркаванняў і рэкамендацый;
2. праекты прывабліваюць новую аўдыторыю;
3. праекты самі па сабе з’яўляюцца моцнай інфанагодай.
Сторытэлінг
У любой гісторыі заўсёды ёсць герой_іня, які_якая пераадольвае нейкую перашкоду, а пасля робіцца падсумаванне. Калі вы ўмееце распавядаць гісторыі, ад вас немагчыма будзе адарвацца. Можна будзе проста напісаць пост, а ў любы пост можна інтэграваць цікавую гісторыю. І, паверце, гэта будзе два зусім розных пасты альбо відэа. У кантэнт-маркетынгу няма нічога, што лепей прадавалася б, чым гісторыі.
Блогеры_кі і інфлюенсеры_кі
Цяпер існуе трэнд на мікраблогераў_ак і мікраінфлюенсераў_ак. Гэта людзі, у якіх ёсць хай невялікая, але максімальна мэтавая аўдыторыя. Чым меншы ваш блог, тым больш у вас мэтавых людзей. А пры павелічэнні блога аўдыторыя ўсё адно размываецца.
Калі вы хочаце прасоўвацца праз блогераў_ак альбо інфлюенсераў_ак, то ўлічвайце, калі ласка, два фактары: як мага больш мэтавай аўдыторыі і супадзенне каштоўнасцяў. Калі каштоўнасці з іншым_ай блогерам_кай супадаюць, то і вашыя аўдыторыі супадаюць, а гэта значыць, што вы павялічыце сваю аўдыторыю.
Сродкі масавай інфармацыі
Калі вы зацікаўленыя будаваць асабісты брэнд і быць чалавекам-брэндам у блогінгу, прысутнасць у СМІ проста неабходная. Але для таго, каб выступаць у СМІ, у вас павінна быць вялікая ідэя, экспертыза і здольнасць даць інтэрв’ю на вашу тэму. СМІ заўсёды знаходзяцца ў пошуку інфармацыі для сваёй аўдыторыі. Задайце сабе пытанне: “Што цікавага я магу распавесці іншым людзям”. Бо канчатковы спажывец – не журналіст_ка, а чытач_ка, слухач_ка альбо глядач_ка.
Рэкамендацыі
Рэкамендацыям цяпер давяраюць больш. Рэкамендацыі менш ангажаваныя, менш перадузятыя і ўтрымліваюць у сабе элемент досведу. Калі хтосьці штосьці рэкамендуе, значыць, ён гэта ўжо паспрабаваў. Давер аўдыторыі да такіх рэкамендацый вышэйшы, чым да самарэкламы блогера_кі. Калі пра вас кажуць, вы “прадаецеся” нашмат лепш, чым калі вы самі пра сябе кажаце – гэта базавае правіла піяру.
Для таго, каб запусціць сеткі рэкамендацый, вы павінны адказаць сабе на два пытанні:
1. Што людзі будуць пра вас казаць?
2. Як людзі будуць пра вас казаць?
Яшчэ вы павінны разумець, што вы не можаце прымусіць людзей вас рэкамендаваць. Але вы можаце абудзіць у іх жаданне гэта рабіць. Калі кажуць, што Расчараванне = Чаканне – Рэальнасць, то формула рэкамендацыі – адваротная. Калі рэальнасць пераўзыходзіць чаканне, то ў чалавека складаецца станоўчае ўражанне, і яно яго стымулюе да таго, каб парэкамендаваць гэта. Калі спажывец_ачка адчувае, што яму_ёй далі больш, чым ён_яна чакаў, хочацца гэтую розніцу як бы вярнуць. І рэкамендацыя дазваляе рэалізаваць гэтае жаданне.
Нэтворкінг
Калі вы ўжо маеце пазіцыяванне і можаце сцісла растлумачыць карысць ад узаемадзеяння з вамі, людзі будуць вас хутчэй запамінаць. Такім чынам, будзе хутчэй усталёўвацца кантакт і ваш асабісты брэнд пачне працаваць на вас. Чым больш у вас карысных кантактаў і сувязяў, тым вышэй ваш сацыяльны капітал і ўплыў. Знаёмцеся з людзьмі як мага часцей, выступайце і дэманструйце сябе сусвету.
