Зробім голас беларускай моладзі чутным!
Старшынька Беларускага нацыянальнага моладзевага савета “РАДА” Маргарыта Ворыхава вылучыла сваю кандыдатуру на ўступленне ў Кансультацыйны Савет па справах моладзі Рады Еўропы (Advisory Council on Youth).
Што такое Кансультацыйны Савет па справах моладзі?
Кансультатыўны савет па справах моладзі – гэта орган Рады Еўропы, які складаецца з 30 прадстаўнікоў і прадстаўніц моладзевых няўрадавых арганізацый і сетак. Савет уносіць свае меркаванні і ўклад ва ўсе напрамкі дзейнасці моладзевага сектара. Ён забяспечвае ўцягнутасць моладзі ва ўсе іншыя формы дзейнасці Рады Еўропы.
Чым займаецца Кансультатыўны Савет?
- Ён робіць унёсак у каардынацыю моладзевай палітыкі па ўсіх кірунках праграмы дзейнасці Рады Еўропы.
- Ён фармулюе меркаванні і прапановы па агульных ці канкрэтных пытаннях па справах моладзі ў Радзе Еўропы, а таксама ў дачыненні да прыярытэтаў, чаканых вынікаў і бюджэтных асігнаванняў на моладзевы сектар.
- Раз на два гады ён прызначае са сваіх сяброў і сябровак прадстаўнікоў і прадстаўніц у Праграмны Камітэт па справах моладзі.
Чаму гэта важна для Беларусі?
Беларусь перажывае перыяд палітычнага крызісу пасля прэзідэнцкіх выбараў, якія прайшлі ў жніўні 2020 года. Адказ урада на мірныя пратэсты і дэманстрацыі быў адзначаны гвалтам, рэпрэсіямі і грубымі парушэннямі правоў чалавека.
У гэтым кантэксце асабліва пацярпела моладзь Беларусі, многія з якой сутыкнуліся з пагрозамі, пераследамі і арыштамі за сваю актыўнасць. “РАДА” і нашыя сяброўскія арганізацыі былі пазбаўленыя рэгістрацыі, а некаторыя нават аб’яўленыя “экстрэмістамі” за ажыццяўленне сваіх правоў на свабоду сходаў і асацыяцый.
Акрамя таго, беларускі ўрад істотна абмежаваў удзел моладзі ў жыцці грамадства. Палітычныя партыі і арганізацыі, якія прадстаўляюць інтарэсы моладзі, або праўладныя, або забароненыя, што зрабіла немагчымым для маладых людзей арганізоўваць і адстойваць свае інтарэсы ў гэтай сферы.
Таму як ніколі важна, каб у моладзі была ўпаўнаважаная прадстаўніца ў Кансультацыйным савеце па справах моладзі, якая магла б выступаць ад іх імя і гарантаваць, што іх меркаванне будзе ўлічана. Праца Савета можа дапамагчы забяспечыць платформу для выказвання меркаванняў моладзі, аблегчыць дыялог з афіцыйнымі асобамі і прасоўваць палітыку, у якой прыярытэт аддаецца патрэбам маладых людзей.
Прызначыўшы прадстаўніцу ад “РАДА”, мы дадзім выразны сігнал аб тым, што маладыя людзі ў Беларусі заслугоўваюць таго, каб іх пачулі, што іх удзел у прыняцці рашэнняў неабходны для будучыні нашага грамадства.
“Дзякуючы маёй працы з “РАДА” і іншымі моладзевымі арганізацыямі ў Беларусі, я асабіста пераканалася ў моцы ўдзелу моладзі і яе станоўчым уплыве на нашыя супольнасці. Я планую працягваць гэтую працу ў межах сваёй ролі ў Кансультацыйным савеце і ўпэўненая, што разам мы зможам дамагчыся значных зменаў у жыцці маладых людзей у Беларусі і за яе межамі”.
Калі вам цікава даведацца больш пра кандыдатуру ці абмеркаваць патрэбы маладых людзей у Беларусі, вы можаце звязацца з Маргарытай па электроннай пошце [email protected].
